विठाई किठाई माझे कृष्णाई कान्हाई

रंगा येई वो येई, रंगा येई वो येई |

विठाई किठाई माझे कृष्णाई कान्हाई ||

वैकुठवासिनी विठाई जगत्र जननी |

तुझा वेधू माझे मनी ||

कटी कर विराजित मुगूट रत्नजडीत |

पितांबरू कासिला तैसा येई का धावत ||

विश्वरूप विश्वं-भरे कमळ-नयने कमळा-करे वो |

तुझे ध्यान लागो बाप रखुमादेवीवरे वो ||

विठ्ठला, तू वेडा कुंभार

फिरत्या चाकावरती देसी मातीला आकार
विठ्ठला, तू वेडा कुंभार !

माती, पाणी, उजेड, वारा
तूच मिसळसी सर्व पसारा
आभाळच मग ये आकारा
तुझ्या घटांच्या उतरंडीला नसे अंत, ना पार !

घटाघटांचे रूप आगळे
प्रत्येकाचे दैव वेगळे
तुझ्याविना ते कोणा नकळे
मुखी कुणाच्या पडते लोणी, कुणा मुखी अंगार !

तूच घडविसी, तूच फोडिसी
कुरवाळिसि तू, तूच ताडीसी
न कळे यातुन काय जोडीसी ?
देसी डोळे, परि निर्मिसी तयांपुढे अंधार !

अरे अरे ज्ञाना झालासी पावन...

अरे अरे ज्ञाना झालासी पावन |

तुझे तुज ध्यान कळो आले ||

तुझा तूचि देव तुझा तूचि भाव |

फिटला संदेह अन्यतत्वी ||

मुरडूनिया मन उपजलासी चित्ते |

कोठे तुज रिते न दिसे रया ||

दीपकी दीपक मावळल्या ज्योती |

घरभरी वाती शून्य झाल्या ||

वृत्तीची निवृत्ति अपणासकट |

अवघेची वैकुंठ चतुर्भुज ||

निवृत्ति परमानुभव नेमा |

शांतिपूर्ण क्षमा ज्ञानदेवो ||